ឆ្នោត សៀមនិងយួន ត្រូវគេបើកលេងម៉ាសេរី នៅទីក្រុងទេសចរណ៍សៀមរាប
).jpg)
សៀមរាប ៖ ល្បែងឆ្នោត សៀម និងយួន ត្រូវបានបើកឲ្យលេងដោយចំហនៅក្រុងសៀមរាប ផ្គើនយ៉ាងពេញទំហឹង ទៅ នឹងបទបញ្ជា របស់ប្រមុខ រាជរដ្ឋាភិបាល ស្តីពីភូមិឃុំ មានសុវត្ថិភាព ហើយករណីនេះ គេទម្លាយមកថា បានបង់លុយឲ្យសមត្ថកិច្ច អស់រាប់លានរៀលក្នុង១ខែៗ ជាថ្នូរនឹងការមិនបង្ក្រាប។
មតិសាធារណជន បានទម្លាយថា ល្បែងឆ្នោតសៀម និងឆ្នោតយួន នេះត្រូវបានក្រុមអ្នកលេងក្នុងខេត្តសៀមរាប សប្បាយចិត្ត និងបើកឲ្យគេចាក់ ដោយសេរីទៅតាមតូច ឬ ធំស្រេចតែចិត្តក៏មេចាំទទួលជានិច្ច។
ប្រភពដដែល ទម្លាយឲ្យដឹងទៀតថា ការបើកឲ្យលេងឆ្នោតដោយសេរីនៅក្នុងខេត្តសៀមរាបនេះដែរគឺដោយមាន ខ្នងបង្អែកជាសមត្ថកិច្ចធំៗ មួយចំនួនបានប្រើឲ្យមន្ត្រីក្រោមឱវាទ ចំនួន២នាក់ ជាអ្នកដើរប្រមូលសេដ្ឋកិច្ច ឡើងឲ្យជារៀងរាល់ថ្ងៃគឺទី១.ឈ្មោះ ទូ និងទី២.ឈ្មោះ ស្គាល់ ។ ចំពោះទីតាំងដែលបើកឲ្យលេងដោយសេរីនោះគឺនៅខាងក្រោយផ្សារលើ,ក្នុងផ្សារសាមគ្គី,ជិតវត្តពោធិ៍លង្កា,ផ្សារដើមក្រឡាញ់ ដែលមានមេធំ ចំនួន៣នាក់ មកពីភ្នំពេញ គឺទី១.ឈ្មោះ ណេ និង អា ភ័ណ្ឌ ដែលជាមេប្រចាំខេត្តសៀមរាប ហើយ បញ្ជូនតទៅអោយមេធំវានៅភ្នំពេញឈ្មោះ ពេជដា នឹង សំ អ៊ុន ។
ប្រភព បន្តថា បន្ទាប់ពីមានការបើកឲ្យលេងល្បែងឆ្នោតគ្រប់ប្រភេទក្នុងខេត្តទេសចរណ៍នេះ ហើយទើបគេសង្កេតឃើញមានករណីចោរកម្មផ្សេងៗកើតមានជាហូរហែហើយករណីនេះពលរដ្ឋមានក្តីកង្វល់ពីសេចក្តីសុខសុវត្ថិភាពរបស់ពួកគាត់យ៉ាងខ្លាំងបន្ទាប់ពីឃើញសភាពយ៉ាងដូច្នេះ ។ បច្ចុប្បន្ននេះ ល្បែងឆ្នោតត្រូវបានគេធ្វើច្បាប់ឲ្យថា ជាឆ្នោតខ្មែរតែផ្ទុយទៅវិញមានលក់តែឆ្នោតសៀមនិងយួនទៅវិញ។
ទាក់ទិនទៅ នឹងករណីនេះដែរ លោកឧត្តមសេនីយ៍ទោ សត ណាឌី ស្នងការនគរបាលខេត្តសៀមរាប បានឲ្យដឹងថា លោកបានប្រជុំ ជំរុញឲ្យកម្លាំងនគរបាលប៉ុស្តិ៍អធិការត្រូវ យកចិត្តទុកដាក់ការងារសន្តិសុខសណ្តាប់ធ្នាប់ និងបង្ក្រាបល្បែងស៊ីសងជាប្រចាំផងដែរ។ លោកបន្តថា ៖ ចាំមើលឲ្យកម្លាំងចុះទៅតាមដានឲ្យច្បាស់ សិនហើយនឹងធ្វើការបង្ក្រាប។
ករណីនេះដែរ មជ្ឈដ្ឋានពលរដ្ឋមានការទន្ទឹងរង់ចាំមើលហើយមើលទៀតថា តើលោក ឃឹម ប៊ុនសុងអភិបាលខេត្តសៀមរាប អាចបញ្ជា ឲ្យកងកម្លាំងក្នុងខេត្តបង្ក្រាបបានឬយ៉ាងណាឬក៏ទុកបន្សល់ឲ្យកូនចៅមានចំហាយពីបទល្មើសខ្លះ? ព្រោះអីមួយរយះនេះ គេឃើញចាប់១ ដង្ហើមចង្រិតប៉ុណ្ណោះតែគេក៏សង្កេតឃើញមួយរយះនេះប្រមុខនៃរាជរដ្ឋាភិបាលបានធ្វើការព្រមានយ៉ាងធ្ងន់ៗឲ្យមន្ត្រីនិងកងកម្លាំងប្រដាប់អាវុធដកខ្លួនចេញឲ្យឆ្ងាយពី បទល្មើសផ្សេងៗដូចជាល្បែងស៊ីសង បទ ល្មើសព្រៃឈើ ជាដើម ៕
![]()
![]()
![]()