ថវិកាជាតិ ឆ្នាំ២០២០ ជិត ៨២០០ លានដុល្លារ កើនឡើង ២២,៧% ធៀបនឹងឆ្នាំ២០១៩
ភ្នំពេញ៖ សេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រង ឆ្នាំ២០២០ ឬហៅថា ច្បាប់ថវិកាជាតិ ឆ្នាំ២០២០ ត្រូវបានរាជរដ្ឋាភិបាល គ្រោងនឹងចំណាយចំនួន ៣៣ ៣៣៩ ៦៣៣ លានរៀល ស្មើប្រមាណ ៨១៩៦ លានដុល្លារអាមេរិក ត្រូវជា ២៨,០១% នៃផលិតផលក្នុងស្រុកសរុប ផ.ស.ស គឺមានកំណើន ២២,៧% ធៀបនឹងច្បាប់ ថវិកាជាតិ ឆ្នាំ២០១៩។ សេចក្តីព្រាងច្បាប់នេះ ត្រូវបានគណៈរដ្ឋមន្ត្រី ដឹកនាំដោយសម្តេចតេជោ នាយករដ្ឋមន្ត្រី ហ៊ុន សែន បានប្រជុំ ពិនិត្យ និងអនុម័ត កាលពីព្រឹកថ្ងៃសុក្រ ទី២៥ ខែតុលា ឆ្នាំ២០១៩។
ខ្លឹមសារសង្ខេបរបស់ក្រសួងសេដ្ឋកិច្ច និងហិរញ្ញវត្ថុ បង្ហាញថា សេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រង ឆ្នាំ២០២០ ដែលគណៈរដ្ឋមន្ត្រី បានប្រជុំ ពិនិត្យ និងអនុម័តនេះ ត្រូវបានគ្រោង សម្រាប់ការដំឡើងបៀវត្សមូលដ្ឋាន ក្នុងអត្រា ៧,០% តាមតម្លៃឯកតាសន្ទស្សន៍ ២៥០០ រៀល ដោយអនុវត្តន៍ចាប់ពីខែមករា ឆ្នាំ២០២០ ព្រមទាំងការដំឡើងប្រាក់បំណាច់មុខងារ នឹងត្រូវអនុវត្ត ចាប់ពីខែមេសា ឆ្នាំ២០២០ ដោយផ្តល់បន្ថែម ៣០០០០ រៀល ជូនមន្ត្រីរាជការស៊ីវិល និងកងកម្លាំងប្រដាប់អាវុធគ្រប់ប្រភេទ ដែលមានប្រាក់បំណាច់មុខងារក្នុងកម្រិតក្រោម ៩៦០០០០រៀល និងចាប់ពីកម្រិត ៩៦០១០០រៀល ដល់ ១១១០០០០ រៀល នឹងផ្តល់បន្ថែមចំនួន ២០០០០រៀល។ ក្នុងនោះ ក៏មានការដំឡើងប្រាក់ឧបត្ថម្ភ ប្រចាំខែសម្រាប់មន្ត្រីជាប់កិច្ចសន្យា ពី ៦៥០០០០រៀល ទៅដល់ ៦៧០០០០រៀល ដោយអនុវត្តចាប់ពីខែមករា ដល់ខែធ្នូ ឆ្នាំ២០២០។
នៅឆ្នាំ២០២០ បៀវត្សអប្បបរមារបស់មន្ត្រីរាជការស៊ីវិល និងកងកម្លាំងប្រដាប់អាវុធ នឹងមានស្ថានភាពផ្លាស់ប្តូរ ដូចខាងក្រោម៖
-បៀវត្សមន្ត្រីរាជការស៊ីវិល នឹងត្រូវបានដំឡើង ចំនួន ១១០០១០០ រៀល នៅឆ្នាំ២០១៩ ដល់ប្រមាណ ១១៤២៥០០ រៀល នៅខែមករា ឆ្នាំ២០២០ ហើយនឹងត្រូវបានដំឡើងដល់ប្រមាណ ១១៧២ ៥០០ រៀល ចាប់ពីខែមេសា ឆ្នាំ២០២០។
-បៀវត្សគ្រូបង្រៀន និងគ្រូពេទ្យ នឹងត្រូវបានដំឡើងពីចំនួន ១២០០១០០ រៀល នៅឆ្នាំ២០១៩ ដល់ប្រមាណ ១២៤២៥០០ រៀល នៅខែមករា ឆ្នាំ២០២០ ហើយនឹងត្រូវបានដំឡើងដល់ប្រមាណ ១២៧២៥០០ រៀល ចាប់ពីខែមេសា ឆ្នាំ២០២០។
-បៀវត្សនគរបាល ( ពលបាលត្រី ) នឹងត្រូវបានដំឡើងពីចំនួន ១១៨៤៥៧៧ រៀល ( គិតបញ្ចូលទាំងរបបអង្ករ ) នៅឆ្នាំ២០១៩ ដល់ប្រមាណ ១២៦ ៩៧៧ រៀល ( គិតបញ្ចូលទាំងរបបអង្ករ ) នៅខែមករា ឆ្នាំ២០២០ ហើយនឹងត្រូវបានដំឡើងដល់ប្រមាណ ១២៥៦៩៧៧ រៀល ( គិតបញ្ចូលទាំងរបបអង្ករ ) ចាប់ពីខែមេសា ឆ្នាំ២០២០។
-បៀវត្សយោធិន ( ពលទោ ) នឹងត្រូវបានដំឡើងពីចំនួន ១០៥៥៩០០ រៀល ( មិនគិតបញ្ចូលរបបអង្ករ ) នៅឆ្នាំ២០១៩ ដល់ប្រមាណ ១០៩៣៥០០ រៀល ( មិនគិតបញ្ចូលរបបអង្ករ ) នៅខែមករា ឆ្នាំ២០២០ ហើយនឹងត្រូវដំឡើងដល់ ១១២៣៥០០ រៀល ចាប់ពីខែមករា ឆ្នាំ២០២០ បើគិតបញ្ចូលរបបអង្ករ ត្រូវជាប្រមាណ ១១៨១៩៧៧ រៀល។
ទន្ទឹមនេះ សម្រាប់ឆ្នាំ២០២០ រាជរដ្ឋាភិបាល នឹងធ្វើការកែសម្រួលនូវកម្រិតអប្បបរមា នៃប្រាក់បៀវត្ស ត្រូវជាប់ពន្ធ ក្នុងគោលបំណងផ្តល់ការលើកទឹកចិត្ត និងលើកកម្ពស់កម្រិតជីវភាពរបស់មន្ត្រីរាជការស៊ីវិល គ្រូបង្រៀន គ្រូពេទ្យ នគរបាលជាតិ យោធិន ក៏ដូចជា កម្មករ និយោជិត ដែលទទួលបានប្រាក់បៀវត្ស ចាប់ពី ១៣០០០០០ រៀល ចុះ ឲ្យរួចផុតពីកាតព្វកិច្ចបង់ពន្ធលើប្រាក់បៀវត្ស។
ក្រៅពីបានដំឡើងប្រាក់បៀវត្សជូនមន្ត្រីរាជការ និងកងកម្លាំងប្រដាប់អាវុធ រាជរដ្ឋាភិបាល ក៏បានគ្រោងថវិកាចំនួន ៤០ប៊ីលានរៀល ដោយឡែកផ្សេងទៀត សម្រាប់ផ្តល់លទ្ធភាពដល់ក្រសួង-ស្ថាប័ន អាចជ្រើសរើសមន្ត្រីមានសមត្ថភាព និងជំនាញខ្ពស់ ចូលបម្រើការងាររដ្ឋ ដែលក្របខណ្ឌ និងគោលការណ៍ នឹងត្រូវបានរៀបចំដាក់ឲ្យអនុវត្តនៅក្នុងឆ្នាំ២០២០។
លើសពីនេះទៀត ថវិកាចំនួន ៥០ប៊ីលានរៀល ត្រូវបានគ្រោងសម្រាប់មូលនិធិថែទាំសុខភាពជូនមន្ត្រីរាជការស៊ីវិល កងកម្លាំងប្រដាប់អាវុធគ្រប់ប្រភេទ និងនិវត្តជន។
រាជរដ្ឋាភិបាល ក៏បានបន្តគ្រោងថវិកាចំនួន ៦ ប៊ីលានរៀល ដើម្បីទ្រទ្រង់របបសន្តិសុខសង្គម ផ្នែកហានិភ័យការងារ សម្រាប់មន្ត្រីសាធារណៈ នៅក្នុងកញ្ចប់ថវិការបស់ក្រសួងសុខាភិបាល។
ចំពោះប្រាក់សោធននិវត្តន៍ ក៏ត្រូវបានគ្រោងថវិកា ចំនួន ៦០ ប៊ីលានរៀល សម្រាប់ការដំឡើងរបបសោធនប្រចាំខែទាបបំផុត ជូនដល់និវត្តជន ដែលជាអតីតមន្ត្រីរាជការស៊ីវិល និងកងកម្លាំងប្រដាប់អាវុធផងដែរ។
ជារួម ថវិកាជាតិឆ្នាំ២០២០ ត្រូវបានរាជរដ្ឋាភិបាល បង្កើនការចំណាយអាទិភាពចាំបាច់ តាមវិស័យទាំង ៤ រួមមាន៖ វិស័យរដ្ឋបាលទូទៅ វិស័យការពារជាតិ សន្តិសុខ សណ្តាប់ធ្នាប់សាធារណៈ វិស័យសង្គមកិច្ច និងវិស័យសេដ្ឋកិច្ច។
ក្នុងនោះ ក្រសួងអប់រំ យុវជន និងកីឡា ត្រូវបានរាជរដ្ឋាភិបាល គ្រោងនឹងចំណាយច្រើនជាងគេ នៅឆ្នាំ២០២០ មានចំនួន ៣ ៧៣៨ ១៣០ លានរៀល ស្មើប្រមាណ ៩១៩ លានដុល្លារ។ បន្ទាប់មក ក្រសួងសាធារណការ និងដឹកជញ្ជូន ចំនួន ៣ ២១៨ ២៣២ លានរៀល ស្មើប្រមាណ ៧៩១ លានដុល្លារ។ ក្រសួងការពារជាតិ គ្រោងចំណាយ ២ ៥៣៦ ៧២៨ លានរៀល ស្មើប្រមាណ ៦២៣ លានដុល្លារ។ ក្រសួងសុខាភិបាល ២ ១០២ ៨៩៩ លានរៀល ស្មើប្រមាណ ៥១៧ លានដុល្លារ និងក្រសួងមហាផ្ទៃ ២ ០៨៣ ១០៧ លានរៀល ស្មើប្រមាណ ៥១២ លានដុល្លារ។
ជាមួយគ្នានោះ ថវិកាជាតិ ឆ្នាំ២០២០ ក៏បានបង្កើនការចំណាយដល់រដ្ឋបាលថ្នាក់ក្រោមជាតិ ក្នុងនោះ ឧបត្ថម្ភរាជធានីខេត្ត ចំនួន ៤៧០២៤លានរៀល ឧបត្ថម្ភមូលនិធិក្រុងស្រុក ចំនួន ២៣៥ ១១៧ លានរៀល មានកំណើន ២២,៤% ធៀបនឹងច្បាប់ ឆ្នាំ២០១៩ និងឧបត្ថម្ភមូលនិធិឃុំសង្កាត់ ចំនួន ៦០៧ ៣៨៦ លានរៀល មានកំណើន ១៦% ធៀបនឹងច្បាប់ឆ្នាំ២០១៩ និងមូលនិធិអភិវឌ្ឍន៍ឃុំសង្កាត់ ចំនួន ១៩៥ ៩៣១ លានរៀល ដែលជាការផ្ទេរធនធានបន្ថែមពីថវិការដ្ឋ ចំនួន ១% ក្នុង ១ឆ្នាំ នៃចំណូលចរន្តថ្នាក់ជាតិ ជូនរដ្ឋបាលឃុំសង្កាត់ សម្រាប់ចំណាយអភិវឌ្ឍមូលដ្ឋាន ចាប់ពីឆ្នាំ២០២០ ដល់ឆ្នាំ២០២៣។
ក្នុងនោះ ការឧបត្ថម្ភធនបន្ថែមនេះ នឹងធ្វើឲ្យទំហំមូលនិធិអភិវឌ្ឍន៍ឃុំសង្កាត់ នឹងកើនឡើងទ្វេដង នៅឆ្នាំ២០២០ ពីប្រមាណ ៣៥០០០ ដុល្លារអាមេរិក ជាមធ្យមក្នុង ១ឆ្នាំ ទៅប្រមាណជាង ៧០០០០ ដុល្លារអាមេរិក ជាមធ្យម ក្នុង ១ឆ្នាំ។
គួរកត់សម្គាល់ថា ចំណាយថវិកាថ្នាក់ក្រោមជាតិ ( ថវិការដ្ឋបាលរាជធានីខេត្ត រដ្ឋបាលក្រុង ស្រុក និងរដ្ឋបាលឃុំសង្កាត់ ) ត្រូវបានបង្កើនជាង ៤ដង គឺពីប្រមាណតែចំនួន ៧៦៦ ប៊ីលានរៀល នៅឆ្នាំ២០១៣ ឬសមមូលស្មើនឹង ១៩០ លានដុល្លារអាមេរិក ដែលមានសមាមាត្រស្មើនឹង ៦,១% នៃចំណាយថវិការដ្ឋសរុប ហើយត្រូវជា ១,២៥% នៃផសស ទៅដល់ប្រមាណ ចំនួន ៣៣២៩ ប៊ីលានរៀល នៅឆ្នាំ២០២០ ឬសមមូលស្មើនឹង ៨២១ លានដុល្លារអាមេរិក ដែលមានសមាមាត្រស្មើនឹង ១០% នៃចំណាយថវិការដ្ឋសរុប ហើយត្រូវជា ២,៨០% នៃផសស។
ក្នុងច្បាប់ថវិកាជាតិ ឆ្នាំ២០២០ រាជរដ្ឋាភិបាលកំណត់ទំហំនៃការខ្ចីប្រាក់ពីដៃគូអភិវឌ្ឍន៍ សម្រាប់ឆ្នាំ២០២០ ក្នុងកម្រិត ១៤០០ លាន SDR ស្មើប្រមាណ ១៩២៧ លានដុល្លារ។ ប៉ុន្តែក្រសួងសេដ្ឋកិច្ច និងហិរញ្ញវត្ថុ បញ្ជាក់ថា ការខ្ចីនេះ នឹងមិនបង្កើតជាបន្ទុកបំណុលវ័ណ្ឌករដល់កម្ពុជាទេ៕
![]()
![]()
![]()